NeiLathala » Blog

Mas Panibagong Bihis

Neil — Fri, 07 May 2010 07:12:41 +0000

Marahil ay nagtataka kayo at kung ano ang nakain ko at sa magkasunod na araw ay may nailagay akong mga bagong posts dito sa blog na ito. At marahil sa mga dati ng nakakabasa ng mga sinulat ko noon, mas nakakapagtaka dahil napapadalas yata ang pang-iIngles ko (wag nyo ng i-tsek pa ang grammar at baka may mali lang, wala na rin akong oras ayusin). Katunayan, yung iba dyan, hindi ako ang nagsulat at ipinasulat ko lang. Pero ano nga ba at bigla na lang nabago ang ihip ng hangin?

Ang katotohanan ay nais ko na rin sanang pagkakitaan ang blog na ito. Kumbaga sa “statistics” ng mga blog, maganda naman ang tinatakbo nito lalo na nung naglagay ako ng mga Ingles na posts. Dahil na rin siguro kahit mga banyagang mambabasa ay naiintindihan naman ang isinusulat ko kumpara dati na talagang purong Tagalog lamang. Pero hindi ito nangangahulugang magiging Ingles ng tuluyan ang blog na ito. Ang mga “regular” kong posts ay mananatiling nasa wikang Filipino. Mga rebyu o me bayad na posts lamang ang gagawin kong Ingles gayundin ang mga tampok na sulatin na akma rin sa mga dayuhang mambabasa tulad ng sinulat ko tungkol sa larong Plants vs Zombies.

Sayang din kasi ang maaaring kitain ng blog na ito. Talaga namang noong una, sinabi kong ayaw ko itong pagkakitaan at ito’y magiging boses ko lamang sa birtwal na kalawakan. Pero sayang talaga ang mga pagkakataon. Kahit barya lang ay papatulan ko na, lalo na pag naiisip kong kung ang iba nga ay mas mahirap pa ang pinagdadaanan para lamang kumita ng pera. Ito’y kahalintulad na pagbibigay sa akin ng isang espasyo sa mataong lugar pero hahayaan ko lamang nakatiwangwang. Kaya mabuti na ang ganito, kumita ng kahit papaano, magkapera kahit papiso-piso…

Blog a Yellow Ribbon – Salamat President Cory

Neil — Mon, 03 Aug 2009 05:51:49 +0000

Isa ako sa milyung-milyong Pilipino na nagdadalamhati sa pagpanaw ng dating Presidente Corazon Aquino. Saksi ako kung gaano kalaki ang naging sakrisipyo nya para sa bayang Pilipinas at kung paano nya minahal ang bayang ito. At bilang pagpupugay sa kanyang mga nagawa upang maibalik ang demokrasya at kalayaan nating mga Pilipino, nagsikap akong palitan ang “theme” ng blog na ito gamit ang kanyang paboritong kulay. Inspirado ng isyu ngayong araw ng Inquirer ang aking ginawang ito.

Aking iniimbitahan ang mga kapwa ko pa blogger na maglaan ng isang blogpost ng pasasalamat para sa namayapang si Presidente Cory. Maaari ninyong kopyahin ang code sa ibaba para inyong magamit ang larawan ng dilaw na ribbon.

Personal kong iniimbitahan ang mga kaibigan kong bloggers: Mhel, Jen, Korky, Zaldy, Kenneth, Melvin, Rizza, Rochelle, Jenny, Fiona, Leony

Paalam, Presidente Cory. Salamat.

SEO mong MOA mo (ulit!)

Neil — Wed, 24 Dec 2008 03:58:27 +0000

Hindi ko alam pero makailang beses ko na yatang ipinangako sa blog na ito na magsusulat ako lagi pero sa di ko rin malamang kadahilanan ay hindi ko talagang magawang regular na magpost dito. Kung ano ang nakain ko at bigla na naman akong nagsulat dito, dalawa lang ang dahilan… PASKO at SEO.

Nagkita kasi ang mga miyembro ng SEO Philippines noong Sabado. Sa katunayan nga, late na itong post ko kung tungkol rin lang sa nasabing pagtitipon ang magiging paksa ng post na ito. Pero dahil na rin sa sinabi ni Meg na marami akong fans na naghihintay basahin ang anumang isusulat ko, eto nga’t gumagawa na ako ng isusulat. Sikat eh! Bukod pa ron, karamihan sa mga nagpunta, halos gumawa na rin ng blog post, at dahil sa andun ako ng gabing yon, sa kanilang pagsasalaysay ng mga nangyari, nabigyan ako ng libreng backlink. Baka naman sabihin nila “I don’t know how to return the favor”. Totoo naman…. pero dahil malakas sa akin ang mga taong iyon, eto at ibibigay ko sa kanila.

Tulad ng nakagawian, late na naman ako dumating. Kasama ko ang kapatid ko para gumawa ng documentary ng mga taong kumikitang kabuhayan sa Internet. Buti na lamang at nagpaunlak agad (bago pa ako pumunta) si Zaldy na magpainterview. Swerte naman at naroon din si Rostum dahil kumbaga sa pelikula, siya ang nangunguna sa billing. Kasama rin nya ang kanyang kabiyak na sa rami na naikwento, kulang na lang magtago si Rostum sa manhole, o hilingin na lang na mawalan siya ng malay nung gabing iyon para tapos na ang usapan. Nagpapasalamat ako sa lahat ng naroon dahil sila ay nagpainterview rin. Ni walang pasubaling sinabi ang kinikita nila sa Internet, kaya behave kayo sa akin, isusumbong ko kayo sa BIR. Si Almer, mabilis pa rin sa babae, kung gaano kasingkit ang mga mata nyan (yang mga matang yan ang pumapatay sa mga kababaihan), siya naman ganun kalaki ang paningin nyan sa mga magaganda. Nakakatuwa lang rin dahil marami pa ring dumating. Si Kenneth, nakita ko na rin sa personal, at tama ang sinasabi ng iba, kung gaano kaingay sa forum at kakulit sa YM, siya namang napakatahimik sa personal. Ayaw pang uminom, muntik ko ng ibili ng Yakult yan. Si Eric andun rin, na mula pa sa Pangasinan ay lumuwas ng Maynila upang makita ang alindog namin, hehehe. “Wag kang mag-alala, maalindog ka rin!” Si Meg, na nagsabi ngang marami akong tagahanga… “Sabihin mo sa kanila, gagawa ako ng fans day.” Si Carol, aka icezorg, na tulad ni Kenneth ay tahimik rin, pero pasasaan bat lalabas din ang kamalditahan nyan. Si Ricky, ang aming litratista, ay lagi kong kakwentuhan ng mga katangahan at pagkakaperahan ng mga tao sa Digital Point. Andun din si Gary, na nalaman kong galing din ng UP Diliman…. kaya pala ramdam ko ang pusong “makibaka”. Marami pa kaming pag-uusapan nyan, malamang tungkol sa rebolusyon. Sino ba naman ang makakalimot sa bigating (si Mito ang nagsabi nito ha?) si Ester? Isa ito sa mga nagbigay ng aliw ng gabing iyon. Sa mga hindi nakapunta, sayang at hindi nyo nasaksihan ang tinutukoy ko. Natutuwa rin ako at dumating si Arnold, isa sa mga taong taas-kamay ako pagdating sa SEO. Simple lang bumanat ito, maging mga website nya, simple rin lang. Gawang Frontpage, static, pero ginagawang gatasan ang Google pagdating sa pagkita sa Adsense. Buti at dumating rin ang paborito kong couple, si Pastor Jeff at si Ate Jen. Sa wakas at nakilala rin ni Ate Jen ang mga tao sa SEO.PH, at umaasa akong makakapunta rin sila sa mga susunod pang pagtitipon.

May mga sensitibong usapan na naganap nung gabing iyon. Kasama na rito ang sinasabing posibleng pagbenta ng domain ng SEO.PH. Hindi ko naman masisisi si Marc kung sakaling ibenta nya ito, siya naman ang may-ari. At kung may katotohanan ang alok na 5 milyong piso para sa SEO.PH, kung ako ang nasa katayuan ni Marc, tatanggapin ko ang alok. Pera pera lang, hehehe. Bilang miyembro, lalo na at bilang tagapangasiwa ng SEO.PH, masakit isipin na mawawala ang website sakaling maibenta ang SEO.PH. Kahit na sabihing lilipat lang ng ibang pangalan ito kung sakali (SEOPHILIPPINES.ORG), nakilala at nakilala ang grupo bilang SEO.PH at mahirap alisin iyon sa aking sistema.

Ako man, kahit na masaya ako sa pamilya ng SEO Philippines, nakakasama rin ng loob na makitang may mga taong panay lang ang kuha ng impormasyon at kaalaman sa grupo pati na rin sa website. Hindi kasi iyon ang natutunan ko sa industriyang ito. Natuto ako ritong gumawa ng sarili kong kabuhayan pero di tulad ng mga tradisyonal na negosyo, iminulat ako nito na kung aangat ako, maaari kong isama sa pag-angat ko ang sinumang nabibilang sa sambayanang Pilipino. Hindi sila lalabas na katunggali sa merkado. Pero sa nakikita ko, mistulang nanghuhuthot lang ng mga ginintuang kaalaman ang ibang miyembro at hindi marunong ibalik sa bayan ang nararapat. Just pay it forward…

Sana ay maihanda na ni Arnold ang kanyang yate para sa susunod na pagtitipon, dun na namin gagawin. At sana makapunta na rin si Kutitap, si Mito, at hindi na makalimot si Alfred. At sa lahat ng aktibong miyembro ng SEO.PH, sana at makadalo rin kayo. At sa kung saan man tayo dalhin ng kapalaran sa buhay ng ating grupo, hiling ko ang suporta ninyo at patuloy na pagsasalin ng kaalaman at pagbahagi ng mga aral sa kapwa Pilipino.

*Note: Ganyan ako kabait, kahit di nagpunta mga yan, me libreng backlink pa rin…. Sa mga pictures, puntahan nyo na lang blog ni Zaldy at Ester, marami run!

Back to Blogging Ulit

Neil — Thu, 30 Oct 2008 02:16:25 +0000

Mahigit isang buwan na rin pala akong hindi nakakasulat dito. Mahirap sabihin na sobrang busy ako tulad ng sinabi ni korky sa huli kong post. Bagaman marami talaga akong ginagawa sa nakalipas na mga araw, ito lang naman halos ang website na hindi ko nabigyan ng panahon. Siguro dahil na rin sa wala naman talagang kinikita ang website na ito kumpara sa mga websites kong naghuhukay ng pera. Ibang motibasyon talaga ang pera, kahit mahirap bigyan ng panahon, pag alam mong kikita ka, bibigyan at bibigyan mo ng panahon.

Sa nakalipas na apat ng linggo, tatlong kasalan sa mga kakilala ko ang naganap – kay Jen at Peds, kay Kitch at Joseph, at siyempre sa brando kong si Noah at si Cathy. Hindi ako nakarating sa naunang dalawang kasal. Pero sa kasal ni Noah at ni Cathy, masaya ako at marami kami sa barkada na andun, kasama ko rin si Kumander. Sa hulihan ng blog post na ito, ilalagay ko ang mga larawan na kuha nung kasal, kasama na rin pala ang mga kuha nung kaarawan ni Adelle, ang maybahay ng isa ko pang brandong si Ryan.

Nga pala, nung September 28, kumuha rin ako ng Licensure Examination for Teachers, or yung tinatawag na LET. Hindi naman sobrang hirap ng exam, bagaman nung bandang una at mistulang natuyo ang mga brain cells ko dahil na rin sa hindi pala pupwede ang nadala kong calculator. Ayun at para akong bumalik sa Panahon ng Lumang Bato at mano-mano kong sinagutan ang mga tanong sa matematika.

Yang burado sa itaas, yan talaga ang isinulat ko ng nakalipas na araw para sa blog post na ito, pero kumbaga sa pagkain, napanis na ang mga gusto kong isulat. Sa totoo lang, tinatamad pa rin akong magpost ng kahit ano para sa araw na ito. Nataon lamang na matatapos na buwan at kahit isa, wala man lang akong nailagay na post. Ayaw ko ng ganun, dahil na rin mababakante ang buwan ng Oktubre. Di bale ng walang kwenta ang post, basta me laman, tutal wala rin namang nagtityagang magbasa.

Bukas nga pala, muling magkikita kita ang mga batikang kasapi ng SEO Philippines sa may Timog. Siguradong aalembong na naman si Almer sa kanyang mga killer moves at si JayL naman ay matutuwa sa mga matututunan niya kay Almer.

Kung ano man ang mga matututunan ko bukas, babalitaan ko na lang kayo. Siguradong babaha ng kaalaman tungkol sa pagkakaperahan ang usapan. Kung nais nyong dumalo, iclick ang link na ito.

SEO mong MOA mo!

Neil — Fri, 15 Aug 2008 02:31:24 +0000

Halos mag-isang buwan din pala akong hindi nakakasulat dito. Sa totoo lang, marami naman akong mga dapat na isusulat nung mga nakaraang araw, kaso lang marami talagang ginagawa at isa pa, hindi ko alam kung paano pa isisingit sa oras ko itong pagpost sa blog na ito. Tatlo ang trabaho ko, at kung tatrabuhin ko pa ang pagsusulat dito, malamang sa ospital na ako pulutin. Pero dahil na rin sa pakiusap ng ilang kakilala ko na ilagay ang mga larawang hinihintay nila, ilalagay ko na rin yun sa isang blog post ng may magbasa naman ng blog na ito, hehe.

Nung isang gabi, matapos ang dalawang beses na hindi pagsipot na mayamang taga-Dubai sa mga pagtitipon ng ilang miyembro ng SEO Philippines, ito ay nagyaya upang magkaroon ulit ng pagkikita ang grupo. Biglaan ang pasabi, dahil aalis na raw siya sa Sabado. Kesa makita siyang nagmumukmok sa kalungkutan at panghihinayang dahil hindi niya malulustay ang kayamanan sa mga dayukdok na tulad namin, minarapat kong pumunta na rin sa napagkasunduang lugar.

Si Edward ang taong tinutukoy ko. Walang sinasanto, lahat sinasagasa. Kahit ako na Admin ng forum ay hindi man lang iginalang, pero sa YM ambait niyan. Parang seminarista. Sa kabila ng lahat, nagpapasalamat ako sa pagkakataong ibinigay nya upang magkitakita kaming mga miyembro. Maraming nakapunta… Si Major, si Maldita, si Mito, si Gurl (na sabi ni Mito ay “yan pare, ambigat niyan” na sabi ko naman “brad, tingnan mo, mabigat talaga yan”), si Anna, si Christian, si Noel (na pangitingiti lang dahil yata kay John Resse), si Almer (ang disiotso anyos na menor de edad), at siyempre ang idol kong si Rostum (mas mapera ito kay Edward).

Well, salamat sa lahat ng nagpunta, kay Edward na siyang gumastos sa lahat ng ininom at kinain namin. Sa mga taong walang humpay na namahagi ng kaalaman tulad paano magkaroon ng 250,000 backlinks gamit ang limang domains at isang software (sayang wala kayo, kaya sa susunod, pupunta na kayo). It’s worth it. Gumastos ako ng singkwenta pesos sa pamasahe dahil pag-uwi ko, malapit na lang (salamat kay Rostum sa pagsabay sa akin). Tapwe! Hihiramin ko ang mga salita ng isang Philip Tiangson “isang blog review lang yan”!

Sana sa susunod mas marami pang makapunta… Mas marami, mas masaya… Mas maraming tips… at sigurado, si Zaldy, mas maraming maiinom!

Eto mga pictures.

WordCamp Philippines 2008

Neil — Mon, 21 Jul 2008 02:20:19 +0000

Halos kulang kulang dalawang buwan at gaganapin na ang Wordcamp Philippines 2008 dito sa Maynila. Nung una, wala talaga akong balak dumalo dahil na rin sa dami ng trabaho ko. Pero naisip ko, ano ba naman ang mawawala kung papatusin ko ang pagkakataong ito, wala na nga akong dapat pang bayaran. LIBRE! Totoo ang nababasa ninyo, walang bayad, gratis! Ano pa ang hahanapin ko, ako na lang ang hinihintay, kaya naman nagparehisto agad ako at sana ay mabigyan ng tsansang mabigyan ng tiket. Kung wala ng upuan, pwede naman akong tumayo maghapon.

Nais kong pasalamatan ang mga tumulong upang matagumpay na maisakatuparan ang adhikaing mabigyan ng mas malawak na kaalaman at pang-unawa ang mga Pinoy sa blogging at sa Wordpress. Bukod sa mga nakalista sa baba, ang unang pasasalamat ko ay para sa grupong Mindanao Bloggers na nagtaguyod ng napakagandang pagkakataong ito.

Walang Oras Mag Blog

Neil — Tue, 22 Apr 2008 03:26:05 +0000

Nung isang buwan, sabi ko sa sarili ko “magiging regular na ang pagsusulat ko rito” pero hindi pa rin yun natuloy. Maging nung nakaraang Semana Santa, marami akong larawan ng mga nagpinitensiya sa amin sa Cainta, pero hindi ko na nagawang isulat pa ang mga obserbasyon ko. Paano nga rin naman, ni hindi ko matanggap na nagsisisi ang mga nakikitang kong nagpapakasakit nung araw na iyon, dahil pagkatapos mismo ng Senakulo, ayun at didiretso sa inuman ang mga hudas.

Nilagay ko lang sa titulo na wala akong oras magblog. Ang katotohanan… meron, pero mas pinipili kong magsulat sa kabila kong blog dahil iyon ang kumikita ng pera. Pera pera lang eh! Mahirap man aminin, mas pinaglalaanan ko ng panahon ang pagsusulat dun. Dahil na rin nga kumikita yun kahit papaano, hindi tulad nito na kelangan ko pang magmakaawa sa mga tao para lang may bumasa ng mga isinusulat ko. (Paawa effect din ang linyang yan, sana regular kayong magbasa rito).

Lahat na lang nagmamahalan, sana mga tao rin matutong magmahalan (taragis na punchline!). Ang bigas, ang mahal. Di na nga ako kumakain ng kanin sa gabi, bukod sa gusto kong lumiit ang tiyan ko, makakatulong pa ako sa kakulangan ng bigas sa bansang Pilipinas.

Pagbati: Sa pinakamamahal kong si Janielle, sa kaibigan kong si April San Juan, kumareng si Jane, sa maganda kong pinsan na si Rhonalisa, kay bestfriend Merlyn na nagdiwang kanilang mga kaarawan, maligayang pagbati!

May pakontest nga pala ako, ang “Blogging Can Change the World” contest. SEO Contest ito. Paunahan lang sa mga resulta sa Google kapag hinanap ang katagang “Blogging Can Change the World.” Nais ko lang isulong na ang pagba-blog ay maaaring magdulot na mabuting epekto sa atin, maging instrumento upang mas maging mabuti ang kalagayan ng mundong ating ginagalawan. Kung nais nyong makiisa sa layuning ito, puntahan lamang ang pahinang ito para sa mga detalye.

Pakikiramay: Sa mga kabatch kong pumanaw na. Jeah Avila at Leovelle Sisante, at sa anak ng kabatch ko ring si Aimee Raagas, dalangin ko ang ikatatahimik ng kanilang mga kaluluwa.

NeiLathala: Reloaded

Neil — Thu, 13 Mar 2008 12:14:37 +0000

Matapos ang matagumpay na kabanata ng buhay ni Inday, muli kong bubuhayin ang blog na ito sa pagsisimula ng bagong bihis at mas madalas na pagsusulat. Sana ay magtuloy-tuloy na ang pagsusulat ko dito. Marami ng buwan ang nagdaan pero halos isang post lamang sa isang buwan ang nagagawa ko. Nakakainggit tuloy ang mga kaibigan kong madalas magblog at may mga regular ng nagbabasa. Paano nga ba nila nagagawa na magkaroon ng regular na mambabasa? Susubukan ko ang mga ginagawa nila. May pa tag tag pang nalalaman. Sige nga try lang… Tag ko si Mhel, Jennie, Korky, Maru, at Glitch.

Bebenta kaya ang mga larawan ko dito? Di naman ako pornstar para puntahan ng nakakarami, at kung nagkataong pornstar nga ako, me pupunta ba? Baka ako pa ang magbayad para lang may pumunta. Sana’y maibigan ng mga pupunta dito ang bago imahe ng aking blog, kasama na ang mga larawan kong sa ayaw at sa gusto ninyo at dadagdagan ko pa.

Bagong blog

Neil — Wed, 23 May 2007 06:18:18 +0000

Sa totoo lang, hindi ko din alam kung makakapagsulat ako lagi sa blog na ito. Bukod sa ilan pang mga websites na aking hinahawakan, marami din akong mga inaasikasong bagay na tingin ko ay mas mahalaga. Mga pinagkakakitaan baga… mga bagay na sa ilan taon kong paggamit ng Internet ay nito lamang mga nagdaang buwan ko napag-alaman. Haaayyy, napakaraming pagkakataon ang nasayang, sana mayaman na ako ngayon, hehehe.

Bukod pa rito, hindi rin nga ako writer by heart. Hindi ko linya ang magsulat, maaaring marami akong kayang sabihin o gustong ipahayag, pero hindi ko talent ang magsulat kagaya ng mga nababasa nyo sa magazine o sa dyaryo. Kung ano man ang nababasa nyo ngayon dito, direkta yan, kung ano lumabas sa utak ko, yan ang tinitipa ng mga darili ko sa keyboard. Minsan lang ako magBACKSPACE, mostly pag wrong spelling pa.

Para di din naman kayo antukin sa mga susunod kong blog entries, naisip kong maglagay ng “inserts” or bits of info para sa inyong karagdagang kaalaman.

Text Quote of the Moment
“I’m sad because I can’t have the one I love… but what I didn’t realize is that somebody else is in much deeper pain for not having me.”

Trivial Matters
Ang isang tunnel worker sa New York ay kayang kumita ng higit sa $100,000 kada taon. Sa piso, ito’y humigit-kumulang 50 milyong piso.

Annoying People
Kinaiinisan ko ang mga taong nagyoyosi sa loob ng jeep! Bakit kasi hindi hulihin ang mga ito, violation ng Clean Air Act yan. Kala mo sila ang may-ari ng jeep, at kahit nga sila pa din yun, ito’y isang malinaw na paglabag sa karapatan ng ibang taong lumanghap ng sariwang hangin.

Useless Website
ClickClickClick – magclick ng magclick hanggang mapasma mga kamay nyo!